2025 жылғы 9 сәуірде III Халықаралық Фараби форумы аясында Әл-Фараби атындағы Қазақ ұлттық университетінің Экономика және бизнес жоғары мектебінің «Қаржы» мамандығы бойынша 2-курс студенттеріне (қазақ тобы) арналған қонақ дәрісі өтті.

Дәріс спикері – Қазақстан Республикасы Қаржы нарығын реттеу және дамыту агенттігінің Әлеуметтік жобалар және қаржылық сауаттылықты арттыру департаментінің бас маманы Ғаділбек Аким болды.

Дәріс барысында спикер:

- Fingramota.kz жобасының қызметі туралы егжей-тегжейлі айтып берді;

- Агенттіктің қаржы және мемлекеттік ұйымдармен, сондай-ақ елдегі жоғары оқу орындарымен ынтымақтастық бағыттарын таныстырды;

- Өткен жылғы халық пен жастардың қаржылық сауаттылығын арттыру бойынша атқарылған жұмыстардың нәтижелерін ұсынды.

Қазақстанның жоғары оқу орындарымен өзара іс-қимылға ерекше назар аударылды:  

Бүгінгі таңда бес ірі университетпен ынтымақтастық туралы меморандумдарға қол қойылған. Бұл келісімдер аясында келесі іс-шаралар жүзеге асырылуда:

- семинарлар мен вебинарлар;

- қонақ дәрістері мен шеберлік сағаттары;

- келесі тақырыптар бойынша іс-шаралар: қаржылық сауаттылық, алаяқтық пен дропперлікке қарсы іс-қимыл, несие беру және сақтандыру негіздері.

Ғаділбек Аким сондай-ақ Агенттіктің Әл-Фараби атындағы ҚазҰУ-мен ынтымақтастығының маңыздылығын атап өтті. Оның аясында «Қаржылық сауаттылық: баршаға арналған практикалық курс» атты оқу-әдістемелік құрал әзірленген, онда қаржылық алаяқтыққа қарсы іс-қимыл мәселелеріне арналған жеке бөлім бар.

Дәріс соңында спикер студенттердің сұрақтарына жауап беріп, қатысушылар арасында қызу қызығушылық пен белсенді пікірталас тудырды.