Автомобиль қажет пе: бюджетіңізге салмақ түсірмей қалай кредит алуға болады

time 6.06.2022
aye 5831
Автомобиль қажет пе: бюджетіңізге салмақ түсірмей қалай кредит алуға болады

2022 жылғы 16 мамырда Қазақстанда жеңілдікпен автокредиттеу бағдарламасы басталды. Мемлекет азаматтарға автокөлікті жылдық 4%-бен және бастапқы жарнасыз сатып алуға мүмкіндік берді. Бағдарлама операторы болып «Өнеркәсіпті дамыту қоры» АҚ белгіленді.

«Жеңілдікті» автокредитті рәсімдеу алдында азаматтар нені білу керектігін Fingramota.kz айтып береді.

Жеңілдікті автокредиттеу бағдарламасының (бұдан әрі – Бағдарлама) қолданыс мерзімі – 30 жыл, қаржыландыру сомасы 100 млрд теңгені құрайды, олар бағдарламаның қолданыс кезеңінде қайтарымды-револьверлік негізде пайдаланылатын болады.

Бағдарлама бойынша отандық өндірістегі Hyundai, Kia, Chevrolet, JAC, Lada сияқты жаңа жеңіл автокөліктерді кредитке алуға болады.

Маңызды өлшемшарттардың бірі – таңдалған автокөліктің құны. Көліктің бағасы 15 млн теңгеден аспауға тиіс. Бұл ретте автокредиттің ең жоғары сомасы 10 млн теңгені құрайды. Кредиттеу мерзімі – 7 жылға дейін. Қарыз теңгемен беріледі. ЕДБ әлеуетті автокөлік иелерінің төлем қабілеттілігін тексереді.

Оларда қарызды беру мәртебесі мен мерзімін қадағалайтын автоматтандырылған жүйе көзделеді. Бұл бағдарламаның міндетті шарттарының бірі болып табылатын қаржыландырудың ашықтығын қамтамасыз ету үшін қажет.

Бюджеттік автомобильдер қандай талаптармен беріледі?

Біріншіден, автомобильді өз талғамыңыз бен таңдаған түсіңізге сәйкес алуға құқылысыз, алайда таңдаған көлігіңіз отандық өндірушінікі болуға тиіс.

Екіншіден, банкке өтінім бергеннен кейін, егер таңдаған автомобиліңіздің маркасы мен моделін өзгерткіңіз келсе, оны өзгерте алмайсыз.

Үшіншіден, кезегіңізді өзгертіп немесе кезектегі орныңызды басқа адамның атына қайта тіркей алмайсыз.

 Төртіншіден, егер қатысудан бас тартсаңыз, электрондық кезектен автоматты түрде шығып қаласыз және сіздің орныңызға кезекке басқа тұрғысы келетін адамдар қосылады.

Бесіншіден, жеңілдікті автокредиттеуге екі жылда бір рет қана қатыса аласыз. Сондықтан, бағдарламаға қатысуға келісім бермес бұрын, алдымен оның «тиімді» және «тиімсіз» жақтарын зерделеп, содан кейін ғана  шешім қабылдаңыз.

Егер нарықтағы ұсыныстарды салыстыратын болсақ, банктер беретін стандартты, коммерциялық автокредиттер кезінде сыйақы мөлшерлемесі жылдық 20%-дан асуы мүмкін, онда міндетті түрде бастапқы жарна төлейсіз, ол шамамен 20%-ды құрайды. Жеңілдікті автокредит оның номиналды мөлшерлемесі мен жарнасының болмауын ескерсек, қолжетімді және тиімді ұсыныстардың бірі болып табылады. Оның артықшылығы автомобильді ресми кірісі жақсы және кредиттік тарихы жағымды кез келген азаматтың сатып алуында болып табылады. 

Бағдарламаға қатысатын қарыз алушы мыналарды сақтауы қажет:

  1. Өз кірісін растау немесе басқа сөзбен айтқанда бұл «төлем қабілеті» деп аталады.
  2. Банкте соңғы 6 айда зейнетақы аударымдарының болуын тексереді. Бұл ретте қарыз алушының жалақысы автокөлік құнына қарай кредитті өтеу үшін жеткілікті болуы керек.
  3. Ресми жалақы жеткіліксіз болатын болса, тиісінше, сізге жеңілдікпен автокредит берілмеуі әбден мүмкін.

Толығырақ «Сақтандыру» бөлімінен оқыңыздар 

white-arrow Тізімге